ஒரு பிரபாகரனை ஒழித்து விட்டு, நூற்றுக்கணக்கான பிரபாகரன்களை உருவாக்கும் பின்புலம் உருவாகியுள்ளது

ஒரு பிரபாகரனை ஒழித்து விட்டு, நூற்றுக்கணக்கான பிரபாகரன்களை உருவாக்கும் பின்புலம் உருவாகியுள்ளது – மங்கள சமரவீர:

 

ஜனாதிபதி மகிந்த ராஜபக்ஷ தலைமையிலான தற்போதைய அரசாங்கத்திற்கு, இலங்கையில் வாழும் தமிழர்கள் உள்ளிட்ட சிறுபான்மையினர் எதிர்நோக்கும் பிரச்சினைகளுக்கு தீர்வுகளை பெற்றுக் கொடுக்கும் உண்மையான நோக்கம் இல்லை என எமது தேசிய முன்னணியின் தலைவரும் நாடாளுமன்ற உறுப்பினருமான மங்கள சமரவீர தெரிவித்துள்ளார்.

இலங்கையின் இனப்பிரச்சினைக்கு தீர்வுகாண அமைக்கப்பட்ட சர்வக்கட்சி பிரதிநிதிகள் குழு மற்றுமொரு நாடக குழு மாத்திரமே எனவும் அவர் குறிப்பிட்டுள்ளார். வடபகுதியின் பிரச்சினைக்கு தீர்வான சர்வக்கட்சி பிரதிநிதிகள் குழு முன்வைத்துள்ள 13வது அரசியல் சாசனத் திருத்தத்தின் பெறுமதி குறித்து, திஸ்ஸ விதாரண, டியூ.குணசேகர, ராஜித சேனாரத்ன, திலான் பெரேரா ஆகிய அமைச்சர்கள் கருத்துக்களை வெளிட்ட போதிலும், விமல் வீரவன்ஸ, சம்பிக்க ரணவக்க, குணதாச அமரசேகர மற்றும் ஜாதிக ஹெல உறுமயவின் பிரதிநிதிகள் 13வது அரசியல் சாசனத்தை விமர்சித்து வருகின்றனர். ஜனாதிபதி மகிந்த ராஜபக்ஷவின், ஆலோசனை மற்றும் உத்தரவின் பேரிலேயே அவர்கள் அதனை விமர்சித்து வருகின்றனர்.

அரசாங்கம், அரச தரப்பினரை கொண்டே, சர்வக்கட்சி பிரதிநிதிகள் குழுவின் யோசனைகளை விமர்சித்து, இரட்டை நிலைப்பாட்டை கடைபிடித்து வருகிறது எனவும் மங்கள சரமவீர குற்றம்சுமத்தியுள்ளார்.

ராஜகிரியவில் உள்ள ஸ்ரீலங்கா சுத்நதிரக் கட்சியின் மக்கள் பிரிவு தலைமையகத்தில் நேற்று நடைபெற்ற ஊடக மாநாட்டில் அவர் இதனை குறிப்பிட்டுள்ளார்.

உண்மையான அமைதியை ஏற்படுத்தும் சவாலை எதிர்க்கொள்ளவும். பொருளாதார அபிவிருத்தியை ஏற்படுத்தவும் புதிய ஜனநாயக சமூகம் ஒன்றினை ஏற்படுத்துவதற்கான பார்iவை, அர்ப்பணிப்பு அல்லது இயலுiமை தற்போதைய அரசாங்கத்திடம் இல்லை.

பயங்கரவாதத்தில் இருந்து நாட்டை மீட்கும் வெற்றிகரமான பணியை முப்படையினரும் காவற்துறையினரும் மேற்கொண்டனர். இந்த நிலையில் உண்மையான அமைதியை வெற்றிக் கொள்ளும் அரசியல் ரீதியான பொறுப்பு தற்போது ஏற்பட்டுள்ளது.

பயங்கரவாதம் தோற்கடிக்கப்பட்டாலும், பயங்கரவாதம் நாட்டில் மீண்டும் தலைக்தூக்க இடமளிக்காது, நாட்டின் நிரந்தர அமைதியை ஏற்படுத்த வேண்டுமாயின் அனைவரும் ஏற்றுக்கொள்ளும் அரசியல் தீர்வு முன்வைக்கப்பட வேண்டும்.

சிங்களம், தமிழ், முஸ்லீம் உள்ளிட்ட அனைத்து மக்களினதும் அடையாளங்கள் பாதுகாக்கப்படும் வகையில் இலங்கைக்கான எண்ணகருவை ஏற்படுத்தும் தேவை எழுந்துள்ளது.

பொருளாதார ரீதியில் அதளபாதாளத்தில் விழுந்துள்ள நாட்டை, பாரிய அபிவிருத்தி நோக்கி இட்டுச் செல்லும் வகையில் அபிவிருத்தி நடவடிக்கைகள் ஆரம்பிக்கப்பட வேண்டும்.

இதுவரை அவ்வாறான வினைத் திறன்மிக்க அபிவிருத்தி நடவடிக்கைகளை அரசாங்கம் ஆரம்பிக்கவில்லை. வடக்கு கிழக்கு மக்கள் இழந்த ஜனநாயகத்தை பெற்றுக் கொடுத்ததாக கூறும் அரசாங்கம், தெற்கில் ஊடகவியலாளர்களையும், பொதுமக்களை படிப்படியாக வேட்டையாடி வருகிறது.

அரசாங்கத்தில் உள்ள குறைந்தளவான அடிப்படைவாத குழுக்கள் காரணமாக. நடுநிலையான நிலைப்பாடுகளை கொண்டுள்ளவர்கக்கான இடம் அற்று போயுள்ளது.
இந்த அடிப்படைவாத குழுவினரால், ஸ்ரீலங்கா சுதந்திரக் கட்சியினர் மந்தைகள் ஆக்கப்பட்டுள்ளதாகவும் மங்கள சமரவீர குறிப்பிட்டுள்ளார்.

அதேவேளை வடக்கில் உள்ள முகாம்களில் வசித்தும் வரும் சிறுவர்களில் 60 பேர், வயிற்றோட்டம் காரணமாக உயிரிழந்துள்ளனர் என தகவல்கள் கிடைத்துள்ளது.

முகாம்களில் தங்கியுள்ள மக்கள் தமது வீடுகளுக்கு விரைவில் செல்லவே விரும்பம் கொண்டுள்ளனர். ஆனால் முகாம்களில் உள்ள மக்கள் கைதிகளை போல் வாழ்ந்து வருகின்றனர். இவ்வாறான நடவடிக்கைகள் ஒரு பிரபாகரனை ஒழித்து விட்டு, நூற்றுக்கணக்கான பிரபாகரன்களை உருவாக்கும் பின்புலம் உருவாக காரணமாக அமைந்து விடும் எனவும் மங்கள சமரவீர குறிப்பிட்டுள்ளார்.